Версія для людзей са слабым зрокам
Рус Бел Eng De Cn Es
На першуюУніверсітэт
Універсітэт

Беларускі дзяржаўны ўніверсітэт – гэта першы класічны ўніверсітэт Беларусі, вядучая ўстанова ў сістэме нацыянальнай адукацыі беларускай дзяржавы, дзе рыхтуецца кадравая эліта.
Яго гісторыя сыходзіць каранямі ў пачатак ХХ стагоддзя. Найстарэйшы ўніверсітэт Беларусі, БДУ быў адкрыты 30 кастрычніка 1921 года. Сёння ён уяўляе сабой велізарны навучальны, а таксама навукова-вытворчы комплекс, які складаецца з вялікай колькасці структурных падраздзяленняў.

 

БДУ – гэта брэнд і знак якасці ў сферы адукацыі і навукі. Паводле даных самых аўтарытэтных міжнародных рэйтынгавых агенцтваў, Беларускі дзяржаўны ўніверсітэт уваходзіць у 1,5 % вядучых універсітэтаў свету. Па ўзроўні занятасці выпускнікоў БДУ займае 115-е месца ў сусветных рэйтынгах, а па ўзроўні прафесійных дасягненняў – 172-е.

 


Універсітэт у поўным аб’ёме рэалізуе фундаментальныя і прыкладныя даследаванні, вытворчасць і прасоўванне навукова-тэхнічных распрацовак. У БДУ прымяняюцца сучасныя тэхналогіі адукацыі, тут створаны ўсе ўмовы для выкладання і навуковай дзейнасці. Прафесарска-выкладчыцкі склад універсітэта справядліва лічыцца адным з найлепшых у нашай краіне.
Навучальныя карпусы БДУ абсталяваны сучаснымі тэхнічнымі прыладамі. У навучальным працэсе актыўна выкарыстоўваюцца мультымедыйныя сродкі, па кожнай дысцыпліне распрацаваны вучэбна-метадычныя электронныя комплексы. Да паслуг навучэнцаў таксама фундаментальная бібліятэка з унікальным фондам літаратуры, шматлікія навукова-даследчыя лабараторыі, навуковыя і навучальныя цэнтры. Універсітэт дапамагае студэнтам у рэалізацыі іх ідэй, дае магчымасці для ўдзелу ў навуковых праектах і канферэнцыях, стварае ўмовы для стартапаў.

 

БДУ рэалізуе канцэпцыю “Універсітэт 3.0” і заахвочвае да стварэння навукова-вытворчых кластараў у мэтах аб’яднання адукацыі, навукі і вытворчасці. Універсітэт актыўна і плённа супрацоўнічае з рэальным сектарам эканомікі Беларусі. Многія кафедры БДУ працуюць з індустрыяльным паркам “Вялікі камень”, Паркам высокіх тэхналогій, вядучымі прамысловымі прадпрыемствамі, фінансавымі ўстановамі, навукова-даследчымі цэнтрамі нашай краіны.

 

У БДУ шырокія сувязі з партнёрамі за мяжой – каля 450 дамоў пра супрацоўніцтва з універсітэтамі, навуковымі і камерцыйнымі арганізацыямі з усяго свету. З гэтай прычыны актыўна развіваецца акадэмічная мабільнасць студэнтаў і выкладчыкаў універсітэта: студэнты стажыруюцца за мяжой і атрымліваюць прафесійна значныя і ўнікальныя кампетэнцыі, а навукоўцы БДУ – навуковыя вынікі, прызнаныя на сусветнай арэне. Апрача гэтага, адкрываюцца сумесныя з замежнымі партнёрамі інавацыйныя, а таксама навукова-даследчыя цэнтры і інстытуты. Паспяхова функцыянуе сумесны беларуска-кітайскі інстытут ДПУ – БДУ.

 


Беларускі дзяржаўны ўніверсітэт штогод выпускае высокакваліфікаваных спецыялістаў. Сярод выпускнікоў БДУ – выдатныя навукоўцы, якія набылі сусветную вядомасць, грамадскія дзеячы, палітыкі, педагогі, пісьменнікі, вынаходнікі і спартсмены. Распрацоўкі навукоўцаў універсітэта шырока выкарыстоўваюцца ў медыцыне, ядзернай энергетыцы, касмічнай, авіяцыйнай галінах, сферы IT і іншых.

 


Акрамя студэнтаў з Беларусі, у БДУ вучацца студэнты з-за мяжы. Яшчэ ў 1961 годзе на базе ўніверсітэта быў адкрыты адзін з першых у СССР і першы на тэрыторыі Беларусі спецыяльны факультэт па навучанні замежных грамадзян. На працягу сваёй гісторыі БДУ падрыхтаваў звыш 10 000 выпускнікоў для іншых краін. Многія з іх – навукоўцы, бізнесмены, прадпрымальнікі, педагогі, славутыя дзеячы культуры.

 


У БДУ ёсць уласны гімн і статут, свая сімволіка і атрыбуты. У гонар універсітэта названа адна з зорак у сузор’і Андрамеды. 29 кастрычніка 2018 года ў БДУ з’явілася ўласная лятучая лабараторыя – студэнцкі нанаспадарожнік BSUSat-1 (CubeBel-1).

 


Гісторыя БДУ поўная надзвычайных фактаў. Калісьці сюды на працу планаваў уладкавацца сам Альберт Эйнштэйн, чый асістэнт – Якаў Громер – ужо працаваў у сценах БДУ. Пэўны час тут вёў дапрызыўную падрыхтоўку будучы маршал Савецкага Саюза Георгій Жукаў. У БДУ таксама выкладалі вядомыя беларускія пісьменнікі і паэты: Я. Колас, П. Глебка, К. Крапіва, П. Броўка і многія іншыя.

 


Універсітэт падтрымлівае свае шматгадовыя традыцыі і асновы, дае магчымасці для ўсебаковай грамадскай, творчай і спартыўнай студэнцкай самарэалізацыі. Студэнцтва БДУ актыўна ўдзельнічае ў грамадзянска-патрыятычных акцыях і руху валанцёраў, заўсёды знаходзіцца ў гушчы падзей, важных для Беларусі, спрыяе ўстойліваму развіццю беларускага грамадства і дзяржавы. На базе ўніверсітэта працуе мноства творчых калектываў, клубаў, грамадскіх аб’яднанняў, органаў студэнцкага самакіравання, спартыўных секцый. Студэнцкі саюз БДУ, БРСМ, Творчы саюз БДУ, прафсаюзныя арганізацыі ўніверсітэта, Студэнцкая асамблея БДУ і іншыя арганізацыі дапамагаюць студэнтам раскрыць свой патэнцыял. Іншагароднім і замежным навучэнцам універсітэт можа забяспечыць пражыванне ў перыяд вучобы і прапанаваць сучасныя інтэрнаты.

 


За час існавання БДУ падрыхтаваў некалькі пакаленняў годных спецыялістаў для Беларусі і іншых краін і працягвае гэту місію дагэтуль, умацоўваючы прэстыж і год ад году прымнажаючы свае дасягненні. Універсітэт можа стаць другім домам і альма-матар для кожнага, хто вырашыць звязаць сваё жыццё з БДУ, атрымаць тут не толькі добрую адукацыю, але таксама прыдбаць карысныя знаёмствы і сувязі, сустрэць сяброў і знайсці месца будучага працаўладкавання.
Сардэчна запрашаем у БДУ!

© Беларускі дзяржаўны ўніверсітэт
Пры капіяванні матэрыялаў спасылка на сайт абавязковая. Ўсе правы абаронены.